ဒီ စာအုပ်ဟာဆိုရင်ဖြင့် အကို ဇဏ်ခီရဲ့ အနုပညာအပေါ် ထင်မြင်ယူဆချက်တွေ၊ လက်ရှိဖြစ်ပျက်နေတဲ့ အမှန်တရားတွေ အပြင် လူမှုပတ်ဝန်းကျင်မှာ လိုအပ်နေတဲ့အကြောင်းအရာတွေ ကို ပေါင်းစပ်ဖန်းတီးထားတဲ့ စာအုပ်လေးပဲဖြစ်ပါတယ်။

စာအုပ်လေးထဲမှာက လက်ရှိဘဝမှာ လိုအပ်နေတဲ့ လက်တွေ့ဆန်တဲ့သဘောတရားတွေ၊ အကြောင်းအရာတွေ ပါဝင်နေတာမို့ လူတိုင်း ဖတ်သင့်တဲ့စာအုပ်လေးတစ်အုပ်ဆိုလည်း မမှားပါဘူး။

စာအုပ်လေးထဲက Admin အကြိုက်ဆုံး ခေါင်းစဉ်လေး ဖြစ်တဲ့ “Sex Education ” ဆိုတဲ့ အကြောင်းအရာလေးကိုပြောပြပေးပါ့မယ်။

————

Sex Education လို့ပြောလိုက်ရင် မြန်မာပြည်က လူတော်တော်များများက “Sex” ဆိုတာကိုပဲ မြင်ပြီး “Education”ကို မမြင်တာလား၊ မမြင်ချင်တာလား ဆိုတာ မသိတော့ပါဘူး။

Sex Education က ဘာအတွက် သင်တယ်၊ ဘာကြောင်းအရာတွေ သင်တယ် ဆိုတာကိုလည်း သိပုံမရကြပါဘူး။ အကို ဇဏ်ခီ က လူတွေက Sex Education ကို Kama Sutra နဲ့ မှားနေတယ်လို့ပြောထားပါတယ်။ တကယ်လည်း အဲ့လိုတွေ ဖြစ်နေကြတာပါ။ ဒါကြောင့်လည်း Sex Education သင်တာကို လက်မခံနိုင်ဘူး၊ လက်ခံစရာမဟုတ်ဘူးဆိုပြီး အချိန်အတော်ကြာငြင်းလာခဲ့ကြတာပဲမဟုတ်လား။

————

Kama Sutra ဆိုတာလည်း ဟိုးအရင်ခေတ်ကတည်းက အိန္ဒိယ မှာရှိခဲ့တဲ့ ကာမကျမ်း(ခေါ်) sex manual ပဲ ဖြစ်ပါတယ်။ ကာမ ဆက်ဆံနည်းပေါင်း မျိုးစုံ၊ Position ပေါင်း မျိုးစုံကို စနစ်တကျ ကျမ်းပြုစုထားတာပါ။ ဘာအတွက်လည်း ဆိုရင်တော့ စိတ်ကျေနပ်မှု အထွတ်အထိတ် ရောက်စေဖို့အတွက် အဓိက ရည်ရွယ်ပါတယ်။ အပေါ်ယံကို ကြည့်လိုက်ရင်တော့ ဒါဟာ သိပ်မှားယွင်းပြီး စက်ဆုပ်ဖွယ်၊ပြက်ရယ် ပြုဖွယ်၊ ညစ်ညမ်းတဲ့ ဏှာပူးကျမ်းကြီးပေါ့။ ဒါပေမယ့် သေချာတွေးကြည့်ပါ။ သတ္တဝါရယ်လို့ ဖြစ်လာရင် မေထုန်ကိစ္စဟာ ဘဝရဲ့ ကြီးမားတဲ့

အစိတ်အပိုင်းတစ်ခု ဖြစ်လာတယ်ဆိုတာ ငြင်းလို့မရပါဘူး။ ငြင်းဖို့လည်း မကြိုးစားသင့်ပါဘူး။ရှက်စရာလည်း မဟုတ်ပါဘူး။ ကျွန်တော်တို့တွေ လူ ဖြစ်လာတယ်ဆိုတာလည်း ကျွန်တော်တို့ရဲ့ အဖေတွေနဲ့ အမေတွေက တစ်ယောက်ကိုတစ်ယောက် ဒီတိုင်းထိုင်ကြည့်ရင်းနဲ့ ဖြစ်လာတာ မဟုတ်ဘူးဆိုတာ အားလုံးသိလောက်မှာပါ။ Kama Sutra ကျမ်းဟာ လူပီပီ တိရစ္ဆာန်တွေလို ကမူရှူးထိုးမဟုတ်ပဲ လူသားဆန်စွာကာမဆက်ဆံနိုင်ဖို့အတွက် ရည်ရွယ်ပြီး ပြုစုထားတဲ့ ကျမ်းကြီးပဲ ဖြစ်ပါတယ်။ “မ” ဖြစ်သူရော၊ “ဖို” ဖြစ်သူရော နှစ်ဦးနှစ်ဖက်မျှတစွာ ခံစားရစေအောင် ပြုစုထားတဲ့ ကျမ်းဖြစ်တဲ့အတွက် gender equality ကိုလည်း အားပေးခဲ့မှန်း ထင်ရှားပါတယ်။

————

Sex Education ဆိုတာက အပေါ်က အကြောင်းအရာတွေကို ကျောင်းတွေမှာ သင်ပေးကြတာမဟုတ်ပါဘူး။ မြန်မာနိုင်ငံမှာလည်း Sex Education ကို သင်ရိုးထဲမှာ ပါလာဖို့ကိုလည်း တော်တော်ကို အချိန်ယူခဲ့ရတာပါ။ ဒါပေမယ့်လည်း လူကြီးတွေတော်တော်များများက လက်မခံနိုင်ကြသေးတာ တွေ့ရမှာပါပဲ။

ဘာလို့ သင်ရိုးတွေမှာ ထည့်သင့်ခဲ့ရတာလည်း ဆိုတော့ လူငယ်တွေ လမ်းမှားမရောက်အောင် ကြိုတင်ကာကွယ်နိုင်ဖို့အတွက်ပဲ ဖြစ်ပါတယ်။

ဟော်မုန်းတွေ ထကြွမှုတွေ၊ ချစ်သူရဲ့ ပူဆာမှုတွေနဲ့ ကိုယ့် ကိုယ်တိုင်က လိုချင်မှုတွေ၊ စမ်းကြည့်ချင်မှုတွေ ပေါင်းလိုက်တဲ့အခါမှာ လူငယ်တွေ ဆက်ဆံမိကြပြီး နောက်ဆက်တွဲ အကျိုးဆက်တွေကို မသိတဲ့အတွက် ဆယ်ကျော်သက် ကိုယ်ဝန်ဆောင်သည်တွေ အများကြီး ဖြစ်လာခဲ့ကြပါတယ်။ တချို့ကျပြန်တော့ STD (Sexually Transmitted Disease) လို့ခေါ်တဲ့ လိင်ဆက်ဆံခြင်းမှ ရတဲ့ ကူးစက်ရောဂါ တွေပါ ရကုန်ကြပါတယ်။

————

ဒီလိုတွေ မဖြစ်ရအောင် Sex Education ကို ကျောင်းသင်ရိုးညွှန်းတမ်းတွေမှာ မထည့်မဖြစ် ထည့်ဖို့ ဖြစ်လာခဲ့ကြပါတယ်။ တချို့ကျောင်းတွေကတော့ Sex education သင်ကြားဖို့အတွက် မိဘတွေဆီက ခွင့်ပြုချက်ကို အရင်တောင်းရပါတယ်။ မိဘ အနေနဲ့ ငြင်းပိုင်ခွင့်ရှိပါတယ်။

သင်ခွင့်ရတဲ့ ကျောင်းတွေမှာတော့ မူလတန်းကနေ စပြီး အထက်တန်းအထိ သိသင့်တယ်လို့ ယူဆတဲ့ အကြောင်းအရာများကို ဖြည်းဖြည်းချင်း အရွယ်အပိုင်းအခြားအလိုက် သင်ကြားပို့ချပေးကြပါတယ်။ ဒါဟာ လူငယ်တွေကို တန်ဖိုးထားရာရောက်ပြီး၊ ကိုယ်တိုင်ရော၊ တစ်ပါးသူကိုပါ တန်ဖိုးထားတတ်အောင်၊ တန်ဖိုးထားတတ်လာအောင် အသိဉာဏ် ဗဟုသုတ တွေကို သင်ကြားပေးတာပဲ ဖြစ်ပါတယ်။

“ရပ်ကွက်ထဲမှာ အိမ်တစ်အိမ်က ရေကူးကန် ရှိတယ် ဆိုရင် ဘယ်လိုပဲ လုံခြုံအောင် ထားထား၊ တစ်ချိန်ချိန်မှာတော့ ကလေးတွေဟာ ခိုးဝင်ပြီး ဆော့မှာပဲ။ အဲဒီတော့ ကိုယ့်ကလေးကို တစ်နေကုန် အမြဲတမ်း စောင့်ကြည့်နေမလား…၊ ရေကူးသင်ပေးထားမလား”

ဒါကို ကြည့်ခြင်းအားဖြင့် Sex Education ဟာ ကလေးတွေကို အန္တရာယ်တွေကနေ ကြိုတင်ကာကွယ်ပေးနိုင်တဲ့ အရာတစ်ခုပဲ ဖြစ်ပါတယ်။

————

ဒီလို လူမှုဘဝအတွက် နေ့စဉ်လိုအပ်တဲ့ အကြောင်းအရာတွေပါတဲ့ စာအုပ်ဖြစ်လို့ မိတ်ဆွေတိုင်း ဖတ်သင့်ပါတယ်။ ဖတ်ဖို့လည်း Recommend ပေးပါတယ်နော်။

ဆရာ ဇဏ်ခီ ရေးသားထားတဲ့ “စံ” ဆိုတဲ့ စာအုပ် ထဲမှ အကြောင်းအရာ တစ်ချို့ကို ဖော်ပြထားတဲ့ အတွက်လည်း ဇလပ်နီ စာပေ စာအုပ်ထုတ်ဝေရေး နှင့် ဆရာ ဇဏ်ခီကိုလည်း Credit ပေးပါတယ်။